ရောဘတ်ကယ်လီက အထောက်အထားတွေ ခိုင်လုံတယ်လို့ ပြော
''ဓာတ်ပုံတွေအများအပြားတွေ့ရပြီး ဒီဓာတ်ပုံတွေကပဲ တော်တော်လေး အဖြေထွက်နေပါတယ်''လို့ နိုင်ငံတကာ အနုမြူစွမ်းအင်အေဂျင်စီ (IAEA) စစ်ဆေးရေးမှူးနဲ့ ညွှန်ကြားရေးမှူးအဖြစ် မကြာခင်အချိန်ကာလတွေထိ တာဝန်ယူခဲ့တဲ့ ဒေါက်တာ ရောဘတ် ကယ်လီက ဘီဘီစီကို ပြောပါတယ်။
ဒေါက်တာ ကယ်လီအပါအဝင် ပညာရှင် ၁၀ ဦးလောက်ကနေ ဓာတ်ပုံတွေအပြင် တခြား စာရွက်စာတမ်းတွေ၊ သတင်းအချက်အလက်တွေကိုလည်း လေ့လာခဲ့ကြပါတယ်။
မြန်မာအစိုးရဟာ ရရှားကို သင်တန်းတွေ စေလွှတ်ခဲ့တယ်၊ ဥရောပကနေ စက်ကိရိယာတွေ ဝယ်တယ်၊ ဒုံးကျည်ထုတ်ဖို့ကိစ္စမှာ မြောက်ကိုးရီးယားက ပါဝင် ပတ်သက်နေတယ်၊ ဒါပေမယ့် မြောက်ကိုးရီးယားဟာ နျူကလီးယားကိစ္စမှာ ပါမပါကိုတော့ မပြောနိုင်သေးဘူးလို့ မစ္စတာ ကယ်လီက ပြောပါတယ်။
မြန်မာနိုင်ငံရဲ့ နျူကလီးယားအစီအစဉ်နဲ့ပတ်သက်လို့ ''ကျွန်တော်ကတော့ ကနဦးအဆင့်လို့ ပြောချင်ပါတယ်။ စက်ရုံနဲ့ စက်ပစ္စည်း တွေကိုကြည့်ရင် နျူကလီးယားအစီအစဉ်အတွက်လို့ ပြောလို့ရနိုင်ပါတယ်။ ဒါပေမယ့် နျူကလီးယားဖြစ်တဲ့အဆင့်ထိတော့ မရောက်သေးပါဘူး။ နျူကလီးယားကိုသွားဖို့ လုပ်ပေးတဲ့ အဆင့်တွေပါ။ ဒါတွေက သိသာ ထင်ရှားပါတယ်'' လို့ မစ္စတာ ကယ်လီက ပြောပါတယ်။
နိုင်ငံတကာကနေ မြန်မာနိုင်ငံကို တားဆီးဖို့ နောက်ကျသွားမှာ စိုးတဲ့အတွက် အခုလို အထောက်အထားတွေနဲ့ တွေ့ရှိချက်တွေကို ထုတ်ပြန်တာ ဖြစ်တယ်လို့ သူက ပြောပါတယ်။
မကြာခင်မှာ နိုင်ငံတကာအနုမြူစွမ်းအင်အေဂျင်စီ (IAEA)ကနေ မြန်မာနိုင်ငံကို ဒီအကြောင်း ဟုတ်မဟုတ် မေးမြန်းလာနိုင်သလို IAEA စာချုပ်တွေမှာ နောက်ထပ် လက်မှတ်ထိုးခိုင်းတာတွေ လုပ်လာနိုင်တယ်လို့ မစ္စတာ ကယ်လီက ပြောပါတယ်။
ဒီမိုကရက်တစ်မြန်မာ့အသံက ထုတ်လုပ်တဲ့ ဒီရုပ်မြင်သံကြားအစီအစဉ်ဟာ ၄၅ မိနစ်ကြာပြီး Al Jazeera ကနေ သောကြာနေ့ကစလို့ ငါးရက်ကြာ ထုတ်လွှင့်ပြသနေတာ ဖြစ်ပါတယ်။
No comments:
Post a Comment