မြန်မာ စစ်တပ်က နျူကလီးယား လက်နက် ပိုင်ဆိုင်ဖို့ ကြိုးစား နေတဲ့ အကြောင်း တွေကို စစ်အစိုးရရဲ့ စက်ရုံတွေ ထဲက မြိုင်စက်ရုံမှာ ဒုတိယ စက်ရုံ တာဝန်ခံ လုပ်ခဲ့ပြီး နောက်ပိုင်း မှာတော့ စစ်တပ် ခေါင်းဆောင် တွေရဲ့ လုပ်ရပ် တွေကို မနှစ်မြို့တဲ့ အတွက် သက်သေခံ အထောက် အထား တွေနဲ့ အတူ နိုင်ငံ အပြင် ဘက်ကို ထွက်လာတဲ့ ဗိုလ်မှူး ဟောင်း စိုင်းသိန်းဝင်း က ပြောတယ်လို့ သိရ ပါတယ်။
တိုင်းပြည် အကျိုးအတွက် အခုလို လုပ်တာလို့ ဆိုတဲ့ ဗိုလ်မှူးဟောင်း စိုင်းသိန်းဝင်း
ဗိုလ်မှူး စိုင်းသိန်းဝင်းရဲ့ အပြောအရ စစ်တပ်က အခုလို မြေအောက် လှိုဏ်ခေါင်းတွေ တည်ဆောက်တာ၊ တာဝေးပစ် စကာ့ဒ် ဒုံးကျည်တွေ တည်ဆောက်တာ၊ နျူးကလီးယား လက်နက် ပိုင်ဆိုင်ဖို့ ကြိုးစား နေတာ တွေဟာ တိုင်းပြည် ဘဏ္ဍာကို ဖြုန်းတီး နေတာလို့ ဆိုပါတယ်။
တိုင်းပြည် အတွက် အကျိုး မရှိဘူးတဲ့အပြင် ဝန်ကြီး ဦးသောင်းတို့၊ ဗိုလ်ချုပ် မောင်အေးတို့၊ ဗိုလ်ချုပ် သန်းရွှေ တို့က အတင်း ခိုင်းနေတာ၊ အမှန်ဆို ပညာရေး၊ ကျန်းမာရေး ဘက်မှာ သုံးသင့် တယ်၊ အရင် တစ်ခေါက်က DVB က ထုတ်လွှင့် ခဲ့တဲ့ လှိုဏ်ခေါင်းတွေ အကြောင်း သတင်း မှတ်တမ်းကို ကြည့်လိုက် ရပြီးနောက်ပိုင်း အခုလည်း မြန်မာ စစ်တပ်က နျူးကလီးယား လက်နက် ရအောင် လုပ်နေ တာကို တားဆီး ရမယ် ဆိုပြီး ဗိုလ်မှူး စိုင်းသိန်းဝင်းကDVB ကို ဆက်သွယ် ထုတ်ဖော် လာတာ ဖြစ်ပါ တယ်လို့ ဒီမိုကရက်တစ် မြန်မာ့ အသံ DVB က ဒုတိယ ညွှန်ကြား ရေးမှူး ဦးခင်မောင်ဝင်း က ပြောပါတယ်။
DVB က ရရှိခဲ့တဲ့ အချက် အလက်တွေ အထောက် အထားတွေကို ၁၀ လ လောက် အချိန်ယူပြီး အပြန် အလှန် သုံးသပ်ခဲ့တယ်၊ နိုင်ငံ တကာက ပညာရှင် ၁၀ ယောက် လောက်နဲ့ စိစစ် မေးမြန်း လေ့လာ ခဲ့တယ်၊ သေချာမှ အခုလို မြန်မာ နိုင်ငံမှာ နျူကလီးယား လက်နက် ထုတ်လုပ်ဖို့ လုပ်နေတဲ့ အကြောင်း မှတ်တမ်း ရုပ်ရှင် ကားကို ဒီနေ့ မနက်က ကာတာ နိုင်ငံ အခြေစိုက် အယ်လ် ဂျဇီးရား ရုပ်သံ ကနေ ထုတ်လွှင့်ခဲ့ ပါတယ်။
မနေ့က ကြိုတင်ပြီး သတင်း ထွက်လာတဲ့အတွက် မြန်မာ နိုင်ငံကို သွားဖို့ ရှိတဲ့ အမေရိကန် အထက် လွှတ်တော် အာရှ-ပစိဖိတ် ဒေသ ဆိုင်ရာ နိုင်ငံခြား ရေးရာ ကော်မတီ ဥက္ကဌ လွှတ်တော် အမတ် ဂျင်မ် ဝက်ဘ် က သူ့ရဲ့ ခရီးစဉ်ကို ဖျက်သိမ်း ခဲ့ပါတယ်။
နိုင်ငံတကာ စိုးရိမ်
အမေရိကန် နိုင်ငံကလည်း မြန်မာ နိုင်ငံမှာ နျူကလီးယား လက်နက် ထုတ်လုပ်ဖို့ အတွက် မြောက်ကို ရီးယားနဲ့ ပူးပေါင်း ဆောင်ရွက် နေတာကို စိုးရိမ် ပူပန်တဲ့ အကြောင်း ထုတ်ဖော် ပြောကြားခဲ့ ပါတယ်။
တရုတ် နိုင်ငံကလည်း သူ့ရဲ့ အိမ်နီးချင်း လေးနိုင်ငံမှာ နျူကလီးယား လက်နက်တွေ ရှိနေပြီး ဖြစ်တာမို့ မြန်မာ နိုင်ငံမှာ နျူကလီးယား လက်နက် ပိုင်ဆိုင် သွားမှာကို လိုလားမှာ မဟုတ်ဘူးလို့ ယူကေ နိုင်ငံ အခြေစိုက် Chatham House နိုင်ငံတကာ လေ့လာရေး ဌာန က အကြီးတန်း သုတေသီ တရုတ်-မြန်မာ ဆက်ဆံရေး ကျွမ်းကျင်သူ ဒေါက်တာ ကယ်ရီ ဘရောင်း က ပြောပါတယ်။
စစ်ခေါင်းဆောင်ဟောင်း အမြင်
မြန်မာ့ တပ်မတော် ကာကွယ်ရေး ဦးစီးချုပ် ဟောင်းနဲ့ အမျိုးသား ဒီမိုကရေစီ အဖွဲ့ချုပ် အင်န် အယ်လ်ဒီ ပါတီ ခေါင်းဆောင် ဦးတင်ဦး ကတော့ အခုလို ပိုက်ဆံတွေ အကုန်ခံပြီး မြေကျင်း ကြီးတွေ တူး၊ တွင်းအောင်း လုပ်ဖို့ မလိုဘူးလို့ ထင်မြင်ကြောင်း၊ ဒီလို နေလို့လည်း လုံခြုံပြီလို့ သူတို့ဟာ သူတို့ ထင်နေပေမယ့် သိပ္ပံ ထွန်းကား တဲ့ ဒီနေ့ခေတ်မှာ တကယ်ကော လုံခြုံပါ့မလားလို့ မေးခွန်းပြန် ထုတ်ပါတယ်။
မြေကျင်းတွေတူး တွင်းအောင်လည်း မလုံခြုံ ပါဘူးလို့ဆိုတဲ့ ဗိုလ်ချုပ်ကြီးဟောင်း ဦးတင်ဦး
မြန်မာ့ တပ်မတော်ဟာ ထိုက်သင့် အားလျော်စွာ ကာကွယ်နိုင်တဲ့ တပ်မတော် ဖြစ်ရင် တော်ပြီလို့ ဦးတင်ဦးက သုံးသပ်ပါတယ်။ အခုလို နျူက လီးယား လက်နက် ထုတ်လုပ် မှုဟာ စစ်တပ် ခေါင်းဆောင် တွေ အနေနဲ့ တိုင်းပြည် အာဏာကို ရယူ ထားခိုက်မှာ ဘုန်းတန်ခိုး ကြီးအောင် လုပ်ကိုင် နေတာလို့ ထင်ကြောင်း၊ စစ်ရေးအရ တိုက်ရ ခိုက်ရအောင် သူများကို ရန်ပြုတဲ့ နိုင်ငံလည်း မဟုတ်ဘူး၊ နိုင်ငံခြားရေး မူဝါဒကလည်း အားလုံးနဲ့ သင့်မြတ်အောင် နေမယ် ဆိုတဲ့ မူဝါဒနဲ့ နေနေတာပဲလို့ ဦးတင်ဦးက ပြောပါတယ်။
နိုင်ငံရေးပါတီတွေရဲ့ သဘောထား
စစ်အစိုးရက ဒီနှစ်ကုန်ပိုင်း လောက် ကျင်းပပေး မယ်ဆိုတဲ့ ရွေးကောက်ပွဲ ဝင်ဖို့ ပြင်ဆင် နေတဲ့ ဒီမိုကရက်တစ် ပါတီက အတွင်းရေး မှူးချုပ် ဒေါ်သန်းသန်းနု ကတော့ နျူကလီးယား လက်နက် ပိုင်ဆိုင် ချင်တယ်ဆိုတာ အင်အား ကောင်းတယ် ဆိုတာကို ပြချင်လို့ ဖြစ်ကြောင်း၊ ဒါပေမယ့် ဒါတွေကို မလုပ်သင့်ဘူး၊ အားလုံး ငြိမ်းငြိမ်း ချမ်းချမ်း ရှိရင် ကောင်းတယ်၊ အဲဒါတွေ ထုတ်လုပ် နေရင် အိမ်နီးချင်း နိုင်ငံတွေပဲ ဖြစ်ဖြစ်၊ ခပ်လှမ်းလှမ်းက နိုင်ငံတွေပဲ ဖြစ်ဖြစ် သူတို့ကို ခြိမ်းခြောက်ရာ ရောက်တယ်၊ ဘယ်နိုင်ငံပဲ ဖြစ်ဖြစ် နျူးကလီးယား လက်နက် မရှိသင့်ဘူးလို့ ပြောပါတယ်။